Aishah kakak Zakir. Aishah ka glah sa SMP. Zakir mantong glah peut SD. Malam nyoe ban dua aneukmit nyan teungoh dimeuruno.  Aishah teungoh imeubaca. Zakir teungoh ipeugeut pe er.  Awaknyan iduk ateuh tika. Bak  tika nyan na saboh meja ubeut. Zakir iteumuleh bak meja nyan. Mak pih geuduk hinan cit, geupeungen dua aneuk mitnyan. Mak geuseumulam sira geumeratep.

            Mandum gabuk ngen but droe. Hana ureung peugah haba meusidroe pih. Teuma imeusu Aishah.

            “Zakir, gense akak ho ka, Zakir cok nyo?” itanyong le Aishah

            “Akak kriet that. Siat tajok pih hanjeut,” jijaweub le  Zakir.

            “Peu nyan gabuk-gabuk?” geutanyong le mak teuma.

            “Akak nyo, mak. cukop brat kriet. Siat tacok gense pih hanjeut.” Seuot zakir.

            “Ken hanjeut, Zakir hana geulake ile, geucok laju. Meunyo geulake, akak bri cit.”

            “Nyan Zakir, aneuk mak beuget akai. Wate tacok atra gob, suah talake ile. Menyo geubri idin, jeut tacok. Meunyo geutham, bek tacok.”

            “Get, mak. Akak, Zakir lake meuah.” Jikheun le Zakir bak Aishah.

            Aishah jianggok jikalon ateuh Zakir.

            Padum uro lheh nyan. Zakir saket. Badan jih suum that. Uro pih ka seupot. Puskesmas ka jitop. Singoh baro  jeut geuba meuubat. Zakir leumoh that. Di eh teupat, hana met mot meubacut.  Mata ka jipet.

            Aishah weuh that jikalon Zakir. Aishah jiduk bak bineh peuratah jijaga adoe jih. Aishah tingat geupeugah le buk guru I rumoh sikula, menyo suum asoe jeut takompreh ngen ie hangat. Lheh nyan, Aishah jijak laju u dapu. Icok ie lam tremoh, iboh lam baskom, ijok andok ubeut sion. Mandum nyan jipeutamong laju lam kama Zakir. Andok nyan jirendam lam ie, Jiceupat, jipeuduk bak dho Zakir. Oh ka padum na trep, jimat le andok nyan. Menyo ka tho, jiulang lom lage buno.

            Zakir jibleut, jikalon Aishah teuduk hinan. “Akak” jimeuhei Aishah

            “Peuna, dek?” tanyong Aishah

            “Zakir grah,”

            Aishah bagah-bagah jibeudoh, jicok ie, jipeujep keu Zakir.

            Hana trep lheuh nyan, geutamong mak lam kama.  

            “Aishah kajeut geujak eh, singoh jak sikula. Bah mak yang jaga Zakir.”

            “Get mak.” Aishah jibeudoh laju, jitamong lam kama droe.

            Mak teusenyom wate geukalon na baskom ie  ngen ija kompreh bak dho Zakir. Seunang that geurasa lam hate, aneukgeuh jimeugaseh sabe syedara. Mak geuraba dho zakir, hana that suum le.

           Lhee uro lheh nyan, Zakir ka sehat teuma, Ka jeut jijak sikula teuma. Zakir ka jeut jiplung-plung jisipak bola.

Oleh : Syarifah Zurriyati, S.S.